काठमाडौँ– गणतन्त्र कोरियाको कृषि, खाद्य तथा ग्रामीण मामिला मन्त्रालयको सहयोगमा हेफर इन्टरनेशनल कोरियाको समन्वय तथा हेफर इन्टरनेशनल नेपालसँगको सहकार्यमा उन्नत नश्लका १०१ कोरेली बाछी र २० साँढेहरु लगायत ५००० डोज जमेको विर्य वस्तुगत सहायता स्वरुप प्राप्त भएको छ ।
दक्षिण कोरियाबाट उन्नत नश्लका ती कोरेली बाछी र साँढेहरु २२, २३, २५ र २८ डिसेम्बर २०२२ गरी चार फरक मिति र उडानबाट नेपाल आइपुगेका हुन । नेपालमा आउने उच्च आनुवंशिक स्तरका पशुधनको साथै गाईमा कृत्रिम गर्भाधानका लागि वीर्य (सिमेन) ढुवानी नेपालमा अहिलेसम्मकोे सबैभन्दा ठूलो परिणामको पशु सहयोग हुनेछ ।
कोरियाबाट आएका यी कोरेली बाछीहरूले बुल मदर्सको न्यूक्लियस बथान स्थापना गर्न मद्दत गर्नेछ । जसले नेपालमा दीर्घकालीन दुग्ध विकासको दृष्टिले राष्ट्रिय आर्थिक समृद्धिका लागि योगदान पु¥याउनेछ । कोरियाबाट वस्तुगत सहायता रुवरुप प्राप्त यी कोरेली बाछीहरु र साँढेहरु सिन्धुलीको कमलामाई नगरपालिकालाई हस्तान्तरण गरिएको छ ।
पशु अनुसन्धान परिषद् खुमलटारमा एक कार्यक्रम गरी कोरियाबाट ल्याएका ८१ वटा कोरेली बाच्छी कमलामाई नगरपालिकालाई हस्तान्तरण गरिएको छ । ५० कृषक परिवारको सुधारिएको गोठमा र साँढेहरुलाई देशभरका राष्ट्रिय पशुपालन कार्यालयका विभिन्न स्थानमा ती गाई राखिनेछ । “द मिल्कीवे कार्यक्रम” कार्यान्वयन गर्न हेफर नेपालसँग सहकार्य गर्दै कमलामाई नगरपालिकाले देशको दुग्ध क्षेत्रको रूपान्तरणका लागि नमुना डेरी गाउँलाई ज्ञान केन्द्रको रुपमा स्थापित गर्ने लक्ष्य राखेको छ ।
कार्यक्रममा बोल्दै कृषि तथा पशुपन्छी विकास मन्त्रालय(पशु) तर्फ सचिव दीपक खरालले दूधको उत्पादन र उत्पादकत्व वृद्धिका लागि निजि क्षेत्र र दातृ निकायबाट प्राप्त वस्तुगत सहायता महत्वपूर्ण रहेको बताए । उनले उन्नत गाईपालनका लागि किसानलाई अभिमुखीकरण तालिम प्रदान गर्नुपर्ने बताए ।
मन्त्रालयका कृषितर्फका सचिव गोबिन्दप्रसाद शर्माले पनि सिन्धुलीलाई डेरी क्षेत्रको नमुना जिल्ला बनाउनुपर्ने बताए ।
