म्याग्दी, २६ मंसिर । म्याग्दी जिल्लाको बेनी–हाँडेभिर–बगरफाँट–सुर्केमेला–बरङ्जा १० किलोमिटर कृषि सडकको कालोपत्र गर्नको लागि काम तीव्र गतिमा अगाडि बढिरहेको छ । जिल्ला पूर्वाधार विकास कार्यालयका इन्जिनियर सञ्जय सुवेदीका अनुसार, हाल बगरफाँटदेखि दूधेखोला खण्डसम्म २।५ किलोमिटर सडकलाई चौडा पार्दै, पानी निकासका लागि नाली निर्माण र ग्राभेल बिछ्याउने काम भइरहेको छ ।
योजनाअन्तर्गत कोटखोलादेखि २।५ किलोमिटर सडकलाई ८ मिटर चौडा बनाउने र दूधेखोला–भकिम्ली खण्डमा ३९० मिटर पक्की ढलान निर्माण गर्ने लक्ष्य राखिएको छ । यो परियोजनाका लागि चालु आर्थिक वर्षमा प्रदेश सरकारले रु १ करोड ६० लाख बजेट छुट्याएको छ ।
यसअघि, हाँडेभिर–बगरफाँट खण्डको २ किलोमिटर सडकको कालोपत्र सम्पन्न भइसकेको छ । साथै, नयाँ पुल क्षेत्रमा १०० मिटर, बाहुनडाँडामा ६५० मिटर, र थामडाँडामा १०० मिटर नयाँ मार्ग खोलिएको छ ।
सडक स्तरोन्नतिले कृषि उत्पादनको ढुवानीमा सहजता ल्याउने र ग्रामीण क्षेत्रको समग्र विकासमा योगदान पुर्याउने अपेक्षा गरिएको छ ।
